प्रहरी प्रमुख १२ हजार घुस रकम सहित पक्राउ
मकवानपुरको पुरानो सदरमुकाम भीमफेदीस्थित इलाका प्रहरी कार्यालयका प्रहरी निरीक्षक (इन्स्पेक्टर) राम बालक राय घूस रकमसहित पक्राउ परेका छन् ।
बागमती प्रदेश प्रहरी कार्यालय हेटौंडाले रायलाई ठेकेदारसँग १२ हजार घुस लिएको अवस्थामा पक्राउ गरेको प्रदेश प्रहरी प्रमुख बसन्तकुमार लामाले जानकारी दिए । उनीमाथि अनुसन्धान भइरहेको प्रहरी नायब महानिरीक्षक (डिआइजी) लामाले जानकारी दिएका छन् ।
प्रदेश प्रहरी कार्यालयले घूस रकमसहित पक्राउ परेका रायलाई निलम्बन गरेको छ । उनलाई पक्राउ गर्न प्रदेश प्रहरी कार्यालयले विशेष टोली पठाएको जनाइएको छ ।
रायलाई प्रदेश प्रहरी कार्यालयमा नियन्त्रणमा राखिएको छ ।
‘प्रहरी निरीक्षक रायलाई घुस लिँदै गरेको अवस्थामा प्रदेश प्रहरीको टोलीले पक्राउ गरेको हो’, डिआइजी लामाले भने । रायविरुद्ध दैनिक जसो घूस लिने गरेको उजुरी प्रदेश प्रहरी कार्यालयमा परेको जनाइएको छ ।
रायलाई भीमफेदी गाउँपालिका-६ मा रहेको सगरमाथा होटलबाट ठेकेदार दुर्गा लामासँग घूस लिँदै गर्दा प्रहरीले पक्राउ गरेको प्रहरीको उच्च स्रोतले जानकारी दिएको छ ।
प्रतिकृया दिनुहोस