अस्ताइन् नेपालकै पहिलो महिला क्याम्पस प्रमुख अंगुरबाबा जोशी
काठमाडौं । शिक्षाविद् एवम् समाजसेवी अंगुरबाबा जोशीको शरीरमा १० थरी निको नहुने रोग थिए । उनले दुई पटक क्यान्सर पचाइन् । मुटु फेल हुँदा पनि हरेश खाइनन् ।
गत साल पनि मृत्युको मुखमै पुगेर फर्किइन् । तर शनिबार भने उनले मृत्युलाई जित्न सकिनन् । उनको निधन भयो ।
तीन सातादेखि छातीमा देखिएको संक्रणका कारण उपचाररत् जोशीको स्ट्रोकका कारण आज दिउँसो २ः४५ बजे काठमाडौंको बाँसबारीस्थित न्यूरो अस्पतालमा निधन भएको पारिवारिक स्रोतले जनाएको छ ।
करिब दुई दशकअघि घाँटीमा क्यान्सर देखिएपछि गरिएको शल्यक्रियाको क्रममा उनको अनुहार बांगिएको थियो । त्यसपछि उनलाई स्तन क्यान्सरसमेत भएको थियो ।
काठमाडौं डिल्लीबजारकी अङ्गुरबाबा नेपालकी पहिलो महिला क्याम्पस प्रमुख थिइन् । जोशीले १८ वर्ष पद्मकन्या क्याम्पसको प्रमुख भएर काम गरेकी थिइन् ।
उनी सात समुद्रपार उच्च अध्ययन गर्न जाने प्रथम नेपाली महिला पनि थिइन् । जोशी विदेश पढ्न जाने पहिलो नेपाली महिलासमेत हुन् । उनले बेलायतबाट उच्च शिक्षा हासिल गरेकी थिइन् ।
उनी २०१९ सालमा राजा महेन्द्रद्वारा गठित चार सदस्यीय संविधान मस्यौदा समितिकी एक मात्र महिला सदस्य थिइन् । संविधान मस्यौदा समितिको सदस्यसमेत रहेकी अंगुरबाबाले महिला संगठनको काठमाडौं सभापति बनेर ९ वर्ष काम गरेकी थिइन् ।
जोशीका दुई छोरी प्रभा र ज्योति, एक छोरा किरणराज तथा बुहारी रुपा जोशी र १०७ वर्षकी सासुआमा चन्द्रकुमारी जोशी छन् ।
प्रतिकृया दिनुहोस