टुट्यो अन्तरजातीय प्रेम : गृहले बनायो सहसचिवको नेतृत्वमा छानविन समिति

काठमाडौं । रुकुम पश्चिममा भएको जघण्य अपराध छाविन गर्न सरकारले सहसचिवको नेतृत्वमा ५ सदस्य छानविन समिति गठन बनाएको छ ।

सरकारले मन्त्रालयका सहसचिवको नेतृत्वमा प्रहरी वरिष्ठ उपरीक्षक, राष्ट्रिय अनुसन्धान विभागका अधिकृत प्रतिनिधि, महान्यायाधिवक्ताको कार्यालयका अधिकृत प्रतिनिधि र गृह मन्त्रालयका उपसचिव रहने गरी ५ सदस्यीय छानबिन समिति गठन गरेको हो ।

शनिबार रुकुमपश्चिम चौरजहारी नगरपालिका–८ सोतीका गाउँलेहरुको कुटाइबाट जाजरकोटको भेरी नगरपालिका–४ रानागाउँका नवराज विक, गणेश बुढामगर र टिकाराम सुनारको मृत्यू भएको छ भने गोविन्द सुनार, सञ्जु विक र गोविन्द साही अझै बेपत्ता छन् । सो घटनाको देशभरका दलित समुदायले विरोध गरिहेका छन् । नवराज विक र चौरजहारीका टीकाराम सुनारको मृत्यु भएपछि देशभरका दलित समुदाय आक्रोसित बनेका छन् ।

सत्तारुढ दल नेपाल कम्युनिष्ट पार्टी (नेकपा) निकट नेपाल दलित मुक्ति संगठनले सो घटनामा दोशी रहेका सबैलाई कानुनी दायरामा ल्याउन माग गरेको छ भने विभिन्न राजनीतिक पार्टी र संघ संस्थाले सो घटनाको निन्दा गरिरहेका छन् ।

गृहमन्त्री रामबहादुर थापा ‘वादल’ ले राष्ट्रिय सभाको मंगलबारको बैकठमा कानुनी राज्य स्थापना गर्नेमा सरकार दृढ रहेको बताएका छन् । घटनामा संलग्न १२ जनालाई नियन्त्रणमा लिइएको बताए । जसमा युवती, युवतीका आमाबुबा, वडाअध्यक्षसमेत रहेका छन् । जोसुकै भएपनि कानुनी कारबाही गरिने गृहमन्त्रीले बताए ।

गृहमन्त्री थापाले दलित युवाले मल्ल थरकी युवतीसँग विवाह गर्न खोज्दा भएको घटनाबारे छानबिन गर्नका लागि समिति गठन भएको संसदलाई जानकारी गराएका हुन् ।

गृहमन्त्रीले जाजरकोटका १९ जनाको समूह केटी भगाउन रुकुम पश्चिम गएको र त्यसै क्रममा केटी पक्षकाले आक्रमण गरेको जानकारी गराए । जसमा केटी भगाउने केटा नवराज विकसहित ३ जनाको शव भेटिएको र ३ जना बेपत्ता रहेको बताए । त्यस्तै बाँकीलाई सामान्य सोधपुछपछि प्रहरीले छोडेको पनि उनले जानकारी गराए ।

‘गृह मन्त्रालयका सहसचिवको नेतृत्वमा प्रहरी वरिष्ठ उपरीक्षक, राष्ट्रिय अनुसन्धान विभागका अधिकृत प्रतिनिधि, महान्यायाधिवक्ताको कार्यालयका अधिकृत प्रतिनिधि र गृह मन्त्रालयका उपसचिव रहने गरी ५ सदस्यीय छानबिन समिति गठन गरिएको छ’ गृहमन्त्री थापाले भने, ‘घटनामा जो संलग्न भए पनि कानुनी दायरामा ल्याइन्छ । कसैलाई कानुले अपराध गर्ने छुट दिँदैन ।’

नवराजकी प्रेमिका भनिएकी युवती ठकुरी परिवारकी हुन् । युवतीको सरसल्लाहमै नवराज सहितको समूह उनलाई लिन सोती पुगेको थिए । तर गाउँले मिलेर उनको समुहलाई लखेटी लखेटी कुटपिट गरेका थिए ।