भारतीय सीमामा अलपत्र परेका सबै नेपालीको उद्धार सुरु, भारतबाट अरु नेपालीले पनि आउन पाउने

काठमाडौं । लकडाउनका कारण एक महिनादेखि महाकाली सीमानामा अलपत्र परेका नेपाली नागरिकको उद्धार सुरु भएको छ ।

भारतका बिभिन्न क्षेत्रबाट मजदुरी गरी आएका नेपालीहरु एक महिना बढी समयदेखि सीमा क्षेत्रमा अलपत्र परेका थिए । क्वारेन्टाइन अवधि सकिए पनि उनीहरुको उद्धारमा ढिलाइ भएको भन्दै बुधबार दिउँसो बसेको सरोकारवालाको बैठकले बिहीबार बिहानबाट उद्धार गर्ने निर्णय गरेको थियो ।

दार्चुलाको सीमा शहर भारतको धार्चुला र बैतडीको सीमा शहर झुलाघाटमा नेपाली मजदुरलाई रोकिएको थियो । भारतको धार्चुलामा रहेका एक हजार ६१ जनालाई आज नेपाल प्रवेश गराउन थालिएको दार्चुलाका प्रमुख जिल्ला अधिकारी यदुनाथ पौडेलले बताए । उनका अनुसार, नेपाल फर्कन चाहनेहरुलाई आउन दिइनेछ ।

भारतको झुलाघाट नाकामा रहेका आठ सय ३७ जनालाई पनि नेपाल ल्याउन लागिएको छ । भारतका विभिन्न क्वारेन्टाइनमा बसेका र अन्य स्वदेश फर्कन चाहनेलाई आउने दिइने भएको हो । उनीहरूलाई भौतिक दूरी कायम गरेर भित्र्याउने र स्वास्थ जाँच गरिने स्थानीय प्रशासनले जनाएको छ ।

क्वारेन्टाइन अवधी सकिएलगत्तै उनीहरुको उद्धारको पहल भएको थियो । तर, संघीय सरकारबाट निर्देशन नआउँदा उद्धारमा ढिलाइ भएको हो ।

केहि दिन पहिलेदेखि बैतडी र बझाङका स्थानीय तहका जनप्रतिनिधिहरु नै आफ्ना नागरिकहरुको उद्धार गर्न भन्दै प्रमुख जिल्ला अधिकारीलाई भेटेरै दबाब दिइरहेका थिए । स्वदेश फर्किएका मजदुरहरुले १४ दिन क्वारेन्टाइनमा बस्नुपर्नेछ । उनीहरुको स्वास्थ्य परीक्षण गरेपछि मात्रै घर पठाइने जनाएको छ।