म्याद सकिएको नुन नबाँड्न गाउँपालिकालाई अदालतको आदेश

सुर्खेत । जुम्लाको हिमा गाउँपाालिकालाई म्याद सकिएको नुन वितरण नगर्न र नगराउन उच्च अदालत सुर्खेत, जुम्ला इजलासले अन्तरकालीन अन्तरिम आदेश जारी गरिएको छ ।

गाउँपालिकाले चैत्र २८ गते म्याद सकिएको नुन वितरण गरेको भन्दै अदालतसम्म प्रतिभा शाही र नेत्रबहादुर शाहीले रिट दायर गरेका थिए । रिटको पक्षमा पदमबहादुर शाहीले मंगलबार भिडियो कन्फ्रेन्सबाट बहस गरेका थिए । अदालतले बिहीबार सबै पक्षलाई बहसमा सहभागी हुन भनेको छ ।

नेपाली कांग्रेस जुम्लाका युवा नेता लक्ष्मण शाहीले गाउँपालिकाबाट वितरित नुनमा म्याद नभएको भनेर आफूहरुले त्यतिबेला नै आवाज उठाएको बताए । शाहीले नागरिकको स्वास्थ्य थप जोखिममा नपरोस् भनेर आफूहरुले विरोध गरेको पनि जनाएका छन् ।