करोडौं भारतीय नक्कली नोटसहित पूर्वमन्त्री अन्सारीका छोरा पक्राउ
दुई सुटकेस भारु कतारबाट नेपाल भित्र्याउने तयारी
काठमाडौं । करोडौँ भारतीय नक्कली नोटसहित पूर्वमन्त्रीका छोरा पक्राउ परेका छन् त्रिभुवन अन्तर्राष्ट्रिय विमानस्थलमा प्रहरीले ठूलो परिमाणमा भारतीय जाली नोटसहित एक जनालाई नियन्त्रणमा लिएको हो । प्रहरी नक्कली नोटसहित पूर्वमन्त्री सलिम मिया अन्सारीका छोरा युनुस अन्सारीलाई शुक्रवार बिहान नियन्त्रणमा लिएको हो ।
पक्राउ परेका युनुस अपराधिक पृष्ठभूमिसँग पटक पटक जोडिएका छन्। उनीमाथि केन्द्रीय कारागारमै गोली प्रहारसमेत भएको थियो । नक्कली नोटकै प्रकरणमा उनी पटकपटक समातिएका छन् । कुनै समय टेलिभिजन संचालनमा समेत सक्रिय रहेका अन्सारी नक्कली नोटसहित सन् २०१४ मा पनि पक्राउ परेका थिए।
उनीबाट बरामद भएको नक्कली नोटको गन्ती भइरहेको प्रहरी स्रोतले जानकारी दिएको छ । उनले दुई सुटकेस भारु कतारबाट नेपाल भित्र्याउने क्रममा प्रहरीले पक्राउ गरेको त्रिभुवन विमानस्थलका सुरक्षा प्रमुख संदीप भण्डारीले जानकारी दिए । उनीसँगै अन्य ३ जनालाई पनि प्रहरीले नियन्त्रणमा लिएको छ।
अन्सारीलाई पाँच वर्षअघि विशेष व्यूरोको टोलीले ३५ लाख नक्कली भारतीय रुपैयाँ सहित पक्राउ गरेको थियो । त्यस्तै २०६५ पुसमा जाली नोट सहित पक्राउ परेका उनी जेल सजाय भुक्तान गरी निस्किएका थिए ।
नक्कली नोटको कारोबारमा जेलभित्र नै रहेको बेला उनलाई २०६७ साल फागुनमा सुन्धारास्थित केन्द्रीय कारागार भित्रै गोली प्रहार भएको थियो ।
राजनीति र अपराधको दुनियामा युनुस नयाँ नाम होइन। नक्कली नोट काण्डमा पटक पटक रहेका युनुस नेशनल टेलिभिजनका संस्थापकसमेत रहे । टेलिभिजन र सिनेमामा समेत लगानी गरेका युनुस पूर्वमन्त्री सलिम मिया अन्सारीका छोरा हुन् । सलिम मिया अन्सारीको ५ वर्ष अघि मृत्यु भइसकेको छ । सलिम मिया तत्कालीन नेकपा एमाले हुँदै शाही शासनकालमा राजवादी बनेका थिए। त्यसपछि राप्रपा हुँदै फेरि माओवादी प्रवेश गरेका थिए ।
प्रतिकृया दिनुहोस