विराटनगर दूरसञ्चार कार्यालयका कर्मचारी मृत फेला
विराटनगर । दूरसञ्चार कार्यालय विराटनगरका एक कर्मचारी मृत फेला परेका छन् ।
मोरङको कानेपोखरी गाउँपालिका–५ राधाकृष्ण टोलस्थित महाराजथान पैनीमा सोमबार उनी मृत्त फेला परेका हुन् ।
विराटनगर महानगरपालिका–५ जामुनगाछी घर भएका ४२ वर्षीय प्रलाद कोइराला मृत्त फेला परेको इलाका प्रहरी कार्यालय पथरीका प्रहरी निरीक्षक कमल बजगाईले बताए । कोइराला दूरसञ्चारका लाइनमेन हुन् ।
बजगाईका अनुसार पानी बगिरहेको पैनीमा डुबेर मृत्यु भएको अवस्थामा कोइरालाको शव फेला परेको हो ।
पैनीमा घोप्टो परेको अवस्थामा शव देखेपछि स्थानीय बासिन्दाले प्रहरीलाई खबर गरेका थिए ।
प्रहरीका अनुसार कानेपोखरी–५ बाट आइतबार साँझ विराटनगरस्थित घरतर्फ फर्किएका कोइरालाको शव सोमबार भेटिएको हो ।
अत्यधिक मादक पदार्थ सेवन गरेका कारण पैनीमा लडेपछि उठ्न नसकेर त्यहीं मृत्यु भएको हुन सक्ने प्रहरी अनुमान छ । शवको कोसी अञ्चल अस्पताल विराटनगरमा पोस्टमार्टम गरिएको छ ।
घटनाका बारेमा थप अनुसन्धान सुरु गरिएको प्रहरीले जनाएको छ ।
प्रतिकृया दिनुहोस