फेरि धमिलियो मौसम, मंगलबार मेघगर्जन र हावाहुरीसहित पानी पर्ने

काठमाडौं । सोमबारदेखि फेरि मौसम परिवर्तन भएको छ । सोमबार देशका केही ठाउँमा वर्षासमेत भयो । मंगलबार बिहान देशका धेरै ठाउँमा मेघगर्जन र हावाहुरीसहित पानी परिरहेको छ ।

सोमबार भित्रिएको पश्चिमी वायुसँग स्थानीय वायु मिसिएकोले सोमबार रातिदेखि नै धेरै ठाउँमा मेघगर्जन र हावाहुरीसहित पानी परिरहेको जल तथा मौसम पूर्वानुमान महाशाखाले जनाएको छ । राति पश्चिममा मेघगर्जन र हावाहुरीसहित पानी पारेको प्रणाली अहिले मध्य क्षेत्रमा आइपुगेको छ । यसकै असरले काठमाडौंसहित मध्य र पश्चिमका धेरै ठाउँमा पानी परिरहेको छ ।

यो प्रणाली पूर्वतिर सरिरहेकाले मंगलबार देशका धेरै ठाउँमा मेघगर्जन र हावाहुरीसहित पानी पर्ने सम्भावना छ । कतै कतै मौसम एकैछिन खुले पनि फेरि बदली भई मेघगर्जन र हावाहुरी चल्नेछ । तर ठूलो पानी पर्ने सम्भावना भने नरहेको महाशाखाका मौसमविद् मिनकुमार अर्यालले बताए ।

प्रिमनसुनको समयमा पानी पर्दा चट्याङ पनि पर्ने भएकाले सावधानी अपनाउन आग्रह छ । मंगलबार रातिदेखि नै मौसममा सुधार आउने अनुमान छ ।