पर्यटन प्रवद्र्धन भ्रमण मलेशिया र इण्डोनेशियामा

 पोखरा । टेकिङ एजेन्ट्स एशोसीयशन अफ नेपाल (टान) पश्चिमाञ्चल क्षेत्रीय सङ्घले आजदेखि अन्नपूर्ण सर्किटसहितका पदमार्गको प्रवद्र्धनको उद्देश्यसाथ मलेसिया र इण्डोनेसियाका लागि ११ दिने प्रवद्र्धनात्मक भ्रमण थालेको छ ।
टान पश्चिमाञ्चल क्षेत्रीय सङ्घका अध्यक्ष हरि भुजेलका अनुसार २२ सदस्यीय प्रवद्र्धन भ्रमण टोलीले मलेसिया, इण्डोनेसिया लगायतका स्थानमा पुगी यहाँका पदयात्रा, पर्यटनका गतिविधि एवं प्राकृतिक सुन्दरता लगायतका विविध पक्षबारे त्यहाँका पर्यटन व्यवसायीसँग अन्तक्र्रिया गर्ने छ । विश्वकै १० उत्कृष्ट पदमार्ग मध्येको अन्नपूर्ण सर्किट लगायतका पदमार्गमा पदयात्राका लागि वर्षेनी ठूलो सङ्ख्यामा विदेशी पर्यटक आउने गरेकोले अन्तर्रा्ष्ट्रिय प्रवद्र्धनात्मक भ्रमण शुरु गरिएको हो ।
अन्नपूर्ण सर्किटमा पछिल्लो समय मलेसिया, इण्डोनेसियाका पर्यटकको आकर्षण बढ्दै गएको उनले बताए । पोखरामा क्रियाशील पर्यटन सम्बद्ध सङ्घ संस्थाको विदेशी मुलुकमा यस अघि पनि विभिन्न प्रवद्र्धनात्मक भ्रमण भए पनि टान पश्चिमाञ्चल क्षेत्रीय सङ्घको आयोजनामा पहिलो पटक अन्तर्रा्ष्ट्रिय बजारमा पदयात्रा क्षेत्रको प्रवद्र्धन हुन लागेको अध्यक्ष भुजेलले बताए ।
यस भ्रमणले गण्डकी प्रदेशसहित समग्र देशको पदयात्रा पर्यटनमा महत्वपूर्ण टेवा पुग्ने बताईएको छ । गण्डकी प्रदेशका उद्योग, पर्यटन, वन तथा वातावरणमन्त्री विकास लम्सालले भ्रमण टोलीलाई आज पोखरामा बिदाइ गरेका हुन् ।
तथ्याङ्कअनुसार नेपाल आउने पर्यटकमध्ये झन्डै ७० प्रतिशत पदयात्राका लागि जाने गरेका छन् । पछिल्लो तथ्याङ्कले नेपाल पदयात्राका लागि आउने कूल पर्यटकमध्ये सिङ्गापुर र मलेसियाका पर्यटकको सङ्ख्या लगभग २५ प्रतिशत रहेको छ । त्यस्तै इण्डोनेसियाबाट आउने पर्यटकको सङ्ख्या १० प्रतिशत छ ।
प्रवद्धनात्मक भ्रमणका संयोजक एवं नेपाल पर्यटन बोर्डका पूर्वसदस्य टिकाराम सापकोटाले सन् २०१८ मा मलेसियाका करीब २५ हजार पर्यटक नेपाल आएको जानकारी दिए । उनका अनुसार यस अवधिमा इण्डोनेसियाबाट आउने पर्यटकको सङ्ख्या लगभग आठ हजार छ । पछिल्ला वर्षमा यी मुलुकबाट आउने पर्यटकको सङ्ख्या वर्षेनी बढ्दै गएको उनले बताए ।