‘भाँडा माझ्न मन नलागे पतिलाई माझ्न लगाउनुस्’

काठमाडौं । सधैं चर्चामा आइरहने बलिउड नायिका सन्नी लियोनीले महिलाले आफ्नो हकका लागि आफैं अग्रसर हुनुपर्ने बताएकी छन् ।

मंगलबार म्याडम टुसादमा आफ्नो मैनमूर्तिको सार्वजनिकीकरण कार्यक्रममा बोल्दै सन्नीले महिलाले अब आफूलाई मन नपर्ने कुरा र गर्न मन नलागेका कुराबारे निर्धक्क भएर बोल्न सक्नुपर्ने बताएकी हुन् । ‘प्रत्येक महिलाले आफ्नो चाहनाअनुसार हिँड्न पाउनुपर्छ । यस्तै कुराले महिलालाई बलियो र आत्मविश्वासी पनि बनाउँछ,’ सन्नीले भनेकी छन् ।

सन्नीले यो पनि बताएकी छन् कि, यदि महिलालाई भाँडा माझ्न मन छैन भने निर्धक्क भएर पतिलाई लगाउँदा हुन्छ । ‘घरमा महिलाले आफूलाई लागेको कुरा ढुक्कसाथ भन्नुपर्छ । यदि उनीहरूलाई भाँडा माझ्न मन छैन भने त्यो काम पतिलाई गर्न लगाउनुपर्छ,’ उनले भनिन्, ‘नीति–नियममा परिवर्तन ल्याउन पहिला घरआँगनबाटै परिवर्तन थाल्नुपर्छ ।’