बिरामी नजाँच्ने चिकित्सकहरुको आन्दोलन १५ दिन स्थगित

काठमाडौं । सरकारले लागू गर्न लागेको मुलुकी अपराध संहिताले चिकित्सकहरुलाई कैदसहितको दण्ड सजायको व्यवस्थाका विरुद्ध नेपाल चिकित्सक संघले घोषणा गरेको आन्दोलन १५ दिनका लागि स्थगित गरेको छ ।

नेपाल चिकित्सक संघले बिहिबार काठमाडौंमा पत्रकार सम्मेलन गरी भदौै १ गते (भोलि) देखि विरामी नजाँच्ने आन्दोलन १५ दिनसम्मका लागि स्थगित गरिएको जानकारी गराएको हो । कार्यक्रम १५ दिनका लागि स्थगित गरिएको संघका अध्यक्ष डा. मुक्तिराम श्रेष्ठले जानकारी दिए ।

संघले आफ्नो लाईसेन्स भने संघको कार्यालयमा बुझाउन देशभर चिकित्सकहरुलाई निर्देशन दिएको छ । सरकारले १५ दिन भित्र पनि आफूहरुको माग अनुसार सो संहिता संशोधन नगरे विरामी नजाँच्ने संघका अध्यक्ष श्रेष्ठले चेतावनी दिए ।

संघले चिकित्सकको लापरबाहीले विरामीको मृत्यु भएमा ५ वर्षसम्म कैद सजाय हुने व्यवस्था संशोधन गरेर लापरबाही भए नभएको पुष्टि गर्न छानवीन समिति बनाउने व्यवस्था गर्न माग गरेको छ ।

कानुन, न्याय तथा संसदीय मामिला मन्त्रालयले संघको माग अनुसार सो संहिता संशोधन गर्ने प्रतिवद्धता जनाएपछि चिकित्सकहरुले पनि भोलीदेखि विरामी नजाँच्ने आफ्नो निर्णय १५ दिन पछि सारेका हुन्।