विधेयक फिर्ता हुनुपर्ने डा. केसीको अडानका कारण वार्ता हुन सकेन

काठमाडौं । सरकारी वार्ता टोली र आमरण अनशनरत चिकित्सक डा. गोविन्द केसी पक्षबीच अनौपचारिक वार्ता जारी रहे पनि प्रतिनिधिसभामा दर्ता भएको चिकित्सा शिक्षा विधेयक फिर्ता हुनुपर्ने अडानका कारण आज पनि औपचारिक वार्ता हुन सकेन ।

डा. गोविन्द केसीको पक्षले राखेका कारण वार्ता ह्न नसकेको शिक्षा, विज्ञान तथा प्रविधि मन्त्रालयका सचिव एवं सरकारी वार्ता टोलीका संयोजक खगराज बरालले बताए ।
“हामीले उहाँहरुलाई निःशर्त वार्तामा आउन औपचारिक आग्रह गरेका छौँ तर केसी पक्षबाट वार्ताका लागि ठोस पहल भएको छैन”, सचिव बरालले भने, “वार्ताबाट निकास निकाल्न सरकार तयार छ तर संसद्मा पुगेको विधेयक फिर्ताको अधिकार हामीसँग छैन ।”

डा. केसीले १० वर्षसम्म काठमाडौँ उपत्यकामा नयाँ मेडिकल कलेज स्थापना नगर्ने अडान राख्दै आएका छन् भने सांसद र कानूनविद् एवं विज्ञहरुले यसको निरुपण सार्वभौम संसद्बाट हुनुपर्नेमा जोड दिँदै आएका छन् ।